خیبرپختونخوا (کے پی) میں بارش سے متعلقہ واقعات میں کم از کم 8 افراد ہلاک اور 9 زخمی ہوگئے۔
پراونشل ڈیزاسٹر مینجمنٹ اتھارٹی (پی ڈی ایم اے) کے مطابق حالیہ بارشوں اور لینڈ سلائیڈنگ کے نتیجے میں 8 افراد ہلاک اور 9 زخمی ہوئے۔ مرنے والوں میں سے چار کی عمریں 10 سال سے کم تھیں۔
پشاور، نوشہرہ، شانگلہ، بنو اور باجوڑ میں بارش اور تیز آندھی سے کئی مکانات کو جزوی نقصان پہنچا۔
محکمہ موسمیات کے مطابق صوبے کے میدانی علاقوں میں آئندہ 24 گھنٹوں کے دوران بارشوں کا سلسلہ جاری رہنے کا امکان ہے جب کہ پہاڑی علاقوں میں برفباری کا سلسلہ جاری رہنے کا امکان ہے۔
دریں اثناء وزیراعلیٰ خیبرپختونخوا علی امین گنڈا پور نے حالیہ بارشوں میں جانی و مالی نقصان پر دکھ کا اظہار کرتے ہوئے متاثرین کے لیے معاوضے کا اعلان کیا ہے۔
وزیراعلیٰ نے صوبے میں حالیہ بارشوں سے ہونے والے نقصانات کے حوالے سے حکام سے رپورٹ بھی طلب کر لی ہے۔