پنجاب کے وزیر خزانہ مجتبیٰ شجاع الرحمان نے مالی سال 2024-25 کا 5.4 ٹریلین روپے کا بجٹ پیش کرتے ہوئے کہا کہ فنانس بل میں کوئی نیا ٹیکس نہیں لگایا گیا۔
انہوں نے کہا کہ دیگر ذرائع سے ریونیو کی وصولی میں 50 فیصد اضافہ کیا جائے گا اور اگلا سالانہ ترقیاتی پروگرام 842 ارب روپے کا ہو گا۔
انہوں نے کہا کہ 77 نئے میگا پراجیکٹس اے ڈی پی کا حصہ ہوں گے جبکہ آئندہ مالی سال کے لیے ریونیو کا ہدف 960 ارب روپے مقرر کیا گیا ہے۔ ریڈیو پاکستان۔
وزیر خزانہ پنجاب نے کہا کہ بجٹ میں کم از کم اجرت 32 ہزار سے بڑھا کر 37 ہزار کر دی گئی ہے اور سرکاری ملازمین کی تنخواہوں میں 25 فیصد تک اضافہ کیا جائے گا۔
انہوں نے کہا کہ پہلی بار اقلیتی ترقیاتی فنڈ میں ایک ارب روپے کا اضافہ کیا گیا ہے اور لیپ ٹاپ سکیم کے لیے 6 ارب روپے رکھے گئے ہیں جبکہ پاکستان کڈنی اینڈ لیور ٹرانسپلانٹ انسٹی ٹیوٹ انڈوومنٹ فنڈ کے لیے 5 ارب روپے رکھے گئے ہیں۔
انہوں نے کہا کہ مہنگائی کی شرح کو 11.8 فیصد تک لایا گیا ہے اور حکومتی اخراجات میں نمایاں کمی کی جا رہی ہے۔
صوبائی وزیر نے کہا کہ پنجاب میں صحت کے شعبے میں انقلابی اقدامات کیے جا رہے ہیں، پنجاب میں متعدد مقامات پر مفت وائی فائی کی سہولت فراہم کی گئی ہے۔
پنجاب کے وزیر خزانہ نے کہا کہ سو یونٹ استعمال کرنے والے بجلی صارفین کو سولر پینل فراہم کیے جائیں گے اور پانچ مرلہ تک گھر بنانے والوں کو آسان قرضے فراہم کیے جائیں گے۔
اس سے قبل آج لاہور میں وزیراعلیٰ مریم نواز کی زیر صدارت ہونے والے اجلاس میں پنجاب کابینہ نے آئندہ مالی سال کے ٹیکس فری بجٹ کی منظوری دی۔
اجلاس سے خطاب کرتے ہوئے وزیراعلیٰ نے کہا کہ عوام سے کیے گئے وعدوں کی تکمیل کے لیے ہر ممکن کوشش کی جائے گی۔