نگراں وزیراعظم انوارالحق کاکڑ بلوچ طلبہ کی عدم بازیابی سے متعلق کیس میں اسلام آباد ہائی کورٹ میں پیش ہوگئے۔
اسلام آباد ہائی کورٹ میں بلوچ طلباء کی عدم بازیابی سے متعلق کیس کی سماعت شروع ہوگئی، جسٹس محسن اختر کیانی نے سماعت کی۔ نگراں وزیراعظم گزشتہ دو سماعتوں میں عدالت کی جانب سے طلب کیے جانے کے باوجود پیش نہ ہونے کے بعد آج عدالت میں پیش ہوئے۔
گزشتہ سماعت پر اسلام آباد ہائی کورٹ نے نگراں وزیراعظم، وزراء اور سیکرٹریز کو پیش ہونے کا حکم دیا تھا جب کہ لاپتہ بلوچ طلباء کی بازیابی کے لیے انٹیلی جنس اداروں پر مشتمل تین رکنی کمیٹی بھی تشکیل دی گئی تھی۔
نگراں وزیراعظم کے علاوہ سیکرٹری داخلہ، نگراں وفاقی وزیر داخلہ گوہر اعجاز بھی ہائیکورٹ میں پیش ہوئے۔