مغربی نظام ملک میں داخل ہونے سے بلوچستان اور خیبرپختونخوا میں بارش اور برفباری کا امکان
جیسے ہی بارش پیدا کرنے والا نظام بلوچستان کے راستے ملک میں داخل ہوتا ہے، پاکستان کے مختلف حصوں میں موسلادھار بارش اور آندھی چلنے کا امکان ہے، حکام نے بین الصوبائی شاہراہوں سے سفر کرنے کے خلاف خبردار کیا ہے۔
چمن اور اس کے گرد و نواح کے علاقے اتوار کو مغربی نظام کے اثر سے تیز گرد آلود ہواؤں کی زد میں رہے۔ دریں اثناء قلعہ عبداللہ، جنگل پیر علی زئی، سرانان، پشین سمیت دیگر علاقوں میں آندھی ہوئی۔
جس کے باعث چمن روڈ سے آمدورفت متاثر ہوئی۔
نیشنل ہائی وے اتھارٹی (این ایچ اے) نے شدید بارش، ژالہ باری اور برف باری کی پیش گوئی کا حوالہ دیتے ہوئے، لوگوں کو آج رات (اتوار) بین الصوبائی شاہراہوں پر “غیر ضروری سفر” سے گریز کرنے کا مشورہ دیا۔
ٹریول ایڈوائزری میں کہا گیا کہ N-50 جو پنجاب کو خیبرپختونخوا سے ملاتا ہے برف باری کے باعث متاثر ہونے کا خدشہ ہے۔
این ایچ اے کے نارتھ کے جنرل منیجر نے بتایا کہ بلوچستان کے بالائی علاقوں سے گزرنے والے راستوں پر ایمرجنسی کیمپس قائم کیے گئے ہیں جبکہ کوزک ٹاپ، این 25، چمن اور دیگر علاقوں میں راستے صاف کرنے کے لیے بھاری مشینری کی موجودگی کو یقینی بنایا گیا ہے۔
اس کے علاوہ کان مہترزئی کیمپ میں راحت اور بچاؤ ٹیمیں اسٹینڈ بائی پر ہیں۔
پاکستان کے محکمہ موسمیات (پی ایم ڈی) نے آج رات (25 فروری) ملک میں داخل ہونے والی ایک مغربی لہر کی پیش گوئی کی تھی، جو 26 فروری اور 27 فروری کو ملک کے بالائی علاقوں کو موسلا دھار بارشوں اور گرج چمک کے ساتھ اپنی لپیٹ میں لے گی۔