وزیر اعظم شہباز شریف نے فیڈرل بیورو آف ریونیو (ایف بی آر) میں اصلاحات اور آٹومیشن کے لیے اسٹیئرنگ کمیٹی تشکیل دے دی۔
تفصیلات کے مطابق وزیر اعظم شہباز 10 رکنی سٹیئرنگ کمیٹی کے چیئرمین ہوں گے اور اس حوالے سے باقاعدہ نوٹیفکیشن بھی جاری کر دیا گیا ہے۔
وفاقی وزراء خزانہ، صنعت، تجارت و پیداوار اور قانون ہائی پروفائل کمیٹی کے رکن ہوں گے۔
فنانس ڈویژن سٹیئرنگ کمیٹی کو سیکرٹریل سپورٹ فراہم کرے گا، جو ایف بی آر کے اصلاحاتی منصوبے پر عمل درآمد کی نگرانی کرے گی۔
قبل ازیں وزیراعظم شہباز شریف نے متعلقہ حکام کو ہدایت کی کہ قومی معیشت کے استحکام کے لیے تمام منصوبوں پر عملدرآمد یقینی بنایا جائے۔
وزیراعظم نے یہ ہدایات اسلام آباد میں ملک کی ترقی کے لیے 5 سالہ اقتصادی روڈ میپ کا جائزہ لینے کے لیے ایک اعلیٰ سطحی اجلاس کی صدارت کرتے ہوئے جاری کیں۔
اجلاس کے دوران مہنگائی میں کمی، غربت کے خاتمے اور روزگار کی فراہمی پر توجہ مرکوز کرتے ہوئے آئندہ پانچ سالوں کا معاشی روڈ میپ پیش کیا گیا۔
وزیراعظم نے کہا کہ اس منصوبے پر عملدرآمد کے لیے معیشت کے مختلف شعبوں کے تمام اسٹیک ہولڈرز سے مشاورت کی جانی چاہیے۔
انہوں نے زراعت، لائیو سٹاک، ٹیکنالوجی، غیر ملکی سرمایہ کاری اور چھوٹے اور بڑے پیمانے کی صنعتوں کی ترقی کے لیے ترجیحی بنیادوں پر کارروائی پر زور دیا۔
شہباز شریف نے اس یقین کا اظہار کیا کہ آئندہ 5 سال کے دوران ملکی معیشت مستحکم ہو کر ترقی کی راہ پر گامزن ہو جائے گی۔
وزیراعظم نے کہا کہ مختلف شعبوں خصوصاً زراعت میں جدید کاری اور جدت سے محصولات اور فی ایکڑ پیداوار میں اضافہ ہوگا۔ انہوں نے کہا کہ خسارے میں چلنے والے سرکاری اداروں کی ترجیحی بنیادوں پر نجکاری کی جائے گی۔